- Annonse -

Vaaghals-kokk Eirik Strøm Lillebø drar heim til Stord for å plukke trøffeltang for å sleppe og betale 9000 kroner kiloen.

Det er ein relativt nyoppdaga delikatesse som veks i fjøra i straumsterke kystområde i Norge. Den heiter eigentleg grisetangdokke, men for dei over gjennomsnittet gastronomisk interesserte går den under namnet trøffeltang.

– Det er jo ein veldig ny greie dette her. Første gong den vart funnen var i fjor, og ein fant ut at det smakte og lukta så mykje trøffel av det, fortel Eirik Strøm Lillebø.

Den utflytta kokken frå Stord er medeigar i restauranten Vaaghals i Oslo, saman med «Gutta på tur»-kjendisane Arne Hjeltnes og Arne Brimi. Han har kombinert påskeferien hos familien på Stord med å førebu menyen når restauranten skal opne etter påske. Då vil ein altså finne trøffeltang frå Stord på den eksklusive menyen.

Passar til sjømat

Slik ser trøffeltangen ut. Teikning: Per Arvid Åsen (1980)

– Eg ser for meg at me skal tørke det og drysse det over fiskerettar eller skalldyr. Trøffeltangen har ein intens aroma som minner om Pèrigord-trøffelen.

Og det er ikkje tvil om at det løner seg for Stord-kokken å dra heim på tangsanking på Stord. Prisen for å kjøpe det hos grossisten er nemleg på heile 9000 kroner kiloen.

- Annonse -
- Annonse -

– Her veks det i store mengder. Eg gjekk i nøyaktig fem minutt før eg fann store førekomster, og brukte ikkje lange tida på å plukke 2-3 kilo.

Lillebø fortel at nordisk mat med naturlege råvarer er svært trendy, og er også noko menyen på Vaaghals er prega av. Difor passar også trøffeltangen perfekt inn.

- Annonse -

– Det ser ikkje akkurat så kjempedelikat ut og ser meir ut som ein dott med kjønnshår. Men alt som kjem frå norsk natur er trendsettande for heile verda. Det er veldig in med nordisk.

Aukande trend med tang

Tang og tare er mest vanleg i asiatisk kjøkken, men har dei siste åra fått ny status i Norge som råvarer til matlaging. I fjor kom kokeboka Tang & Tare ut, med oppskrifter for korleis å bruke råvara i matlaging. Det er sagt at vikingane åt tang, som er fullstappa av mineralar og vitaminar. Men i dag er det dei færraste som ser på tang som noko anna enn ugras. Lillebø oppmodar likevel folk til å prøve seg.

– Det finst ingen giftige tangsortar i Norge, så eg vil oppmode folk til å prøve seg fram. Det er veldig lettvint. Eg har oppbevart det i sjøvatn og så skylt det godt før eg kjem til å tørke det. Etter å ha testa litt er mitt heite tips er å tørke det på badegolvet.

Kokken er spent på korleis den nye råvara vil slå an. Blir det ein suksess kan det hende familien hans på Stord kjem til å sjå mykje til han framover.

– Dette er på forskningsstadiet hos oss. Blir dette ein suksess så kan det hende med marknadsfører dette kraftig. Eg trur me er den einaste restauranten i Oslo som har dette. Då blir det nok mange turar til Stord på meg framover.

- Annonse -