Det var i mai i fjor at denne cabincruisaren gjekk på land i stor hastigheit på Fitjar-sida av kommunegrensa, nord for Jektevik. Foto: tipsar
- Annonse -

Politiet ventar framleis på svara frå blodprøvene av dei to førarane av båten som kolliderte med land nord for Jektevik søndag.

Det var tidleg søndag morgon at ein cabincruiser med to førarar om bord kolliderte med eit svaberg i høg hastigheit nord for Jektevik. Førarane melde ikkje frå om at dei hadde berga seg på land før fleire timar seinare.

Ulukka førte til ein omfattande leiteaksjon, der mellom anna redningsdykkarar og eit Sea King-helikopter deltok i søket. Politiet er tydelege på at dei mistenker at dei to førarane var påverka av alkohol.

Blodprøvene tek tid

– Me går utifrå at det er snakk om promillekøyring, men svaret på blodprøvane tar litt tid. Det kan gå nokre veker før me får stadfesta det, fortel Trond Atle Sjøvoll, politiførstebetjent ved Stord lensmannskontor.

Dei to førarane, som begge er på Stord, er formelt sikta i saka og vart avhøyrt av politiet måndag.

- Annonse -

– No står det att noko etterforsking før me har eit klart bilete av kva som har skjedd. Då får me sjå om det fører til tiltale for den eine eller begge som var om bord.

Har vitne til kollisjonen

Sjøvoll vil ikkje kommentere kva dei sikta har forklart om årsaka til at dei ikkje melde frå om ulukka.

– Eg vil helst ikkje seie så mykje om det enno. Men eg kan seie at dei var om bord i båten då den gjekk på land.

– Var det vitne til sjølve kollisjonen?

– Ja, det finst nokre vitne til kollisjonen.

Ventar på svar

Politiet etterforskar også den andre båtulukka på Fitjar på søndag, der ein 75 år gammal mann blei alvorleg skada.

– Me har føretatt noko etterforsking på staden, men har ikkje avhøyrt førar av helsemessige årsaker. Me får berre vente og sjå kva svar me får, seier Sjøvold.

- Annonse -