- Annonse -
- Annonse -
- Annonse -

Den norske grøssaren «Hjemsøkt» har premiere i haust, med stordabuen Synnøve Macody Lund i hovudrolla.

Det er ikkje berre stordabuen Severin Eskeland som markerar seg innan grøssarsjangeren. Skodespelar Synnøve Macody Lund (41) frå Stord vil denne hausten også setje sitt preg på filmlerretet når grøssaren «Hjemsøkt» har premiere.

Synnøve Macody Lund, her frå filmen Hodejegerne frå 2011.

Filmen vil vere hovudrolledebuten til Macody Lund.

– Eg er ein pen Frogner-dame som blir plassert i eit heimsøkt hus. Då byrjar det å skje ting, seier Lund til NTB.

Sjå trailaren øvst i saka.

Godt manus

- Annonse -

Stordabuen fortel at ho blei bergteken av filmmanuset til forfattar Maja Lunde, som er mest kjend for boka «Bienes historie».

– Alt byrjar med eit godt manus. Dette var det første eg har lese som eg fekk «wow-kjensla» av. Maja er flink til å skru handling, seier Macody Lund, som fortel at ho alltid har vore glad i grøssarsjangeren.

Filmen vart spelt inn i eit herskapeleg hus på Gran på Hadeland midt i dei mørkaste vintermånadane. Macody Lund fortalde i eit intervju med VG i sommar at det var ei krevjande tid.

– Krevjande

– Ikkje berre fordi det var minus 17 på Gran, men det er krevjande å gå rundt og vere redd tolv timar om dagen og vise 180 nyansar av redsel, sa Macody Lund.

Synnøve Macody Lund var i fleire år ein profilert filmmeldar, før ho gjorde sitt gjennombrot då ho spelte mot Aksel Henie i «Hodejegerne» i 2011.

«Hjemsøkt» vil ha  premiere på norske kinoar 24. november.

- Annonse -