IT-bedrifta Skye vart kåra til årets gasellebedirft av Dagens Næringsliv i 2014. No kjem dei også til Stord. Foto: skjermbilete, Skye.no
- Annonse -
- Annonse -
- Annonse -

Fire tidlegare tilsette frå IT-selskapet Frontica håper på å skape endå fleire arbeidsplassar på Stord når dei no startar no for seg sjølv i Leirvik sentrum.

Den nye avdelinga til IT-selskapet Skye AS vil starte opp med fire tilsette, og vil halde til i dei tidlegare lokala til Salt Ship Design i Leirvik sentrum, skriv Sunnhordland.

– Eg ser veldig lyst på framtida her, og trur dette vil bli ei satsing som viser igjen. På sikt håpar me å bidra med endå fleire arbeidsplassar lokalt, seier Geir Inge Imsland til avisa. Han er ein av dei fire som står bak nysatsinga.

Dei fire som står bak nysatsinga har alle bakgrunn frå verksemda Frontica, som i fjor haust vart kjøpt opp av den amerikanske IT-giganten Cognizant. Før det hadde selskapet kutta kraftig i tilsette i Norge, og fleire titals har gått frå selskapet på Bleikjehaugen på Stord det siste året.

- Annonse -

Skye AS er eit selskap basert i Kolbotn, og har frå før eit avdelingskontor i Rogaland og i Sverige. Selskapet vart starta i 2007, og har sidan den gongen hatt ein eventyrleg vekst. I 2015 hadde selskapet 45 tilsette, og ein omsetnad på 93 millionar kroner.

Dei vart kåra til årets gasellebedrift av Dagens Næringsliv i 2014, og har som formål at dei gjer «alt av IT for ei bedrift utanom Word og Powerpoint»

- Annonse -