Ein patrulje rykte utFoto: Jonas Sætre/Stord24
- Annonse -

– Eg trur nok at politiet skjelv litt i buksene no, for dei veit at me har dyktige fotballspelarar, seier mottaksleiar Håkon Frode Særsten.

Onsdag 24. mai, klokka 18.00 er det duka for venskapskamp på Solid-banen i Sagvåg mellom tilsette ved Stord lensmannskontor og bebuarar ved Litlabø mottak.

Kampen blir organisert etter initiativ frå nokre av gutane som bur på mottaket. Dei tok tidlegare kontakt med ein patrulje som var på besøk på Litlabø, og presenterte då ønsket sitt.

Førebyggjande tiltak

– Me tenkjer at dette kan vere eit godt førebyggjande tiltak som kan bidra til at me styrkar forholdet mellom bebuarane og politiet, seier Marit Rolfsvåg ved Stord lensmannskontor.

Politiet stiller med 12 meir eller mindre fotballdyktige spelarar. Det dei eventuelt manglar av talent trur dei kan vegast opp i konkurranseinstinkt.

- Annonse -

– Me går naturlegvis for siger, understreker Rolfsvåg.

Mottaksleiar Håkon Frode Særsten trur politiet får ein tøff kamp. Foto: Venstre

Mottaksleiar Håkon Frode Særsten fortel om eit svært godt samarbeid med politiet i dei snart to åra mottaket har vore i drift.

– Me har eit fantastisk godt samarbeid med politiet, og har kontakt med dei kvar veke på eit venskapeleg plan. Det er ikkje anna enn på sin plass at me speler fotballkampar i lag også, seier Særsten.

Dårlege opplevingar

Han fortel om eit politi som har vore svært hjelpsame, sjølv om det ikkje har vore snakk om kriminalitet. For både mottaket og politiet har det vore viktig å bygge tillit, då mange av ungdommane har vore svært skeptiske til politi frå heimlandet sitt.

– Det har jo kome kommentarar frå gutane om at i Norge er til og med politiet snille. Mange av desse har dårlege opplevingar med politi frå heimlandet, og så har dei jo hatt ymse erfaringar på vegen til Norge. Mange har difor ein viss uro når dei ser folk i politiuniform.

Særsten trur politiet bør vere førebudd på hard motstand.

– Eg trur nok at dei skjelv litt i buksene no, for dei veit at me har dyktige fotballspelarar.

- Annonse -