Illustrasjonsfoto: Politiet
- Annonse -
- Annonse -
- Annonse -

Politiet har avhøyrt både kvinna og mannen som var involvert i knivstikkinga i Valevåg i Sveio fredag kveld.

Det var i 23-tida fredag kveld at politiet blei oppringt av ein mann i 40-åra som fortalte at han hadde knivstukke ei kvinne i ein privatbustad i Valevåg.

Kvinna, som også er i 40-åra, blei frakta til Stord sjukehus der ho blei operert for livstrugande skader. Politiet har likevel klart å gjennomføre avhøyr av både kvinna og mannen i løpet av laurdagen.

– Det har vore ein krangel, som har ført til ein situasjon der han har knivstukke kvinna i mageregionen, fortel jourhavande jurist i Sør-Vest politidistrikt, Per Terje Brundtland.

Politiet skildrar timane etter hendinga på fredag som dramatiske.

– Det var ein alvorleg og kritisk situasjon på fredag. Heldigvis utvikla det seg til at dette no ser ut til å gå bra. Dette kunne lett fått endå meir alvorlege følgjer.

Forklarte seg likt

- Annonse -

Det var ingen vitne til ugjerninga, men politiet seier at forklaringa til begge stemmer overeins, og at dei difor har oversikt over kva som skjedde.

– Avhøyret av kvinna varte ikkje så lenge, for ho var sjølvsagt prega av operasjonen. Men sikta sin forklaring stemmer overeins med det fornærma sjølv har gitt uttrykk for, seier Brundtland.

– Kva relasjon er det mellom dei to?

– Relasjonen er at dei er i eit forhold, men dei er ikkje gift eller sambuarar.

Får kontakt- og besøksforbod

Brundtland fortel at den mannen, som er sikta for grov kroppsskade, no har sleppt ut av fengsel, etter å ha blitt arrestert fredag kveld.

– Han vil ikkje bli framstilt for varetektsfengsling. Bakgrunnen for det er at me kjenner me har god nok informasjon til at det ikkje er fare for provstap. Men han vil bli gitt eit kontakt- og besøksforbod.

– Korleis vil de jobbe vidare med saka?

– No blir det vidare etterforsking slik at me får kartlagt fleire detaljar, og danna oss eit komplett bilete på kva som skjedde og kvifor det skjedde.

- Annonse -