Akhtar Chaudhry fekk ein drapstrugsel som kommentar på eit innlegg han skreiv om hijab-debatten. Foto: Anne Sofie Ekeland Valvatne/Wikipedia (CC-lisens)
- Annonse -
- Annonse -
- Annonse -

Mannen som kom med drapstrugslar mot SV-politikar og nyinnflytta stordabu Akhtar Chaudhry, må møte i Sør-Trøndelag tingrett i slutten av august.

Bakgrunnen for saka er eit blogginnlegg som Chaudhry publiserte på Nettavisen i januar, i samband med kjenninga frå Gulating lagmannsrett i den såkalla hijab-saka.

Dagen etter fekk han inn ein kommentar som var så alvorleg at han valde å melde vedkommande til politiet. Den tiltalte skreiv blant anna følgjande i kommentaren:

«Måtte en klok person med våpen se sitt snitt til snarest mulig å avlive Akhtar Chaudhry med et hodeskudd fordi dette avskummet på ingen måte fortjener å leve».

Hatefulle ytringar

No er det klart at mannen i 50-åra er blitt tiltalt for hatefulle ytringar for trugslane. Rettssaka er planlagt å gå for Sør-Trøndelag tingrett i slutten av august, skriv Nettavisen.

- Annonse -

Både forsvarar og politiadvokat seier overfor Nettavisen at dei ikkje ynskjer å kommentere saka ytterlegare.

Chaudhry er i dag seksjonsleiar i Integrerings- og Mangfaldsdirektoratet og har ei aktiv rolle som politikar i samfunnsdebatten. Den tidlegare visepresidenten til Stortinget flytta nyleg til Stord etter å ha budd lenge i Oslo.

Ubehageleg trugsel

Han fortel at trugselen ikkje var noko kjekk å få i mot seg.

– Denne typen trugslar er aldri hyggelege. Dei er ubehagelege og går på eit personleg plan. Ikkje minst ubehageleg for familien. I tillegg er dei ikkje akseptable. Difor melde eg vedkommande og er glad for at det no er tatt ut tiltale, opplyser Chaudhry til Stord24 i dag.

Han har ingen intensjonar om å gi seg som politikar som følgje av dette.

– Slike trugslar er meint for å skremme folk vekk frå samfunnsarenaen og meint for å truge folk frå å delta. Dette kjem ikkje til å påverke meg som politikar. Den gleda skal dei ikkje ha. Eg kjem til å halde fram i samfunnsdebatten, det er viktig i vårt demokrati, seier Chaudhry.

- Annonse -