Foto: Jonas Sætre/Stord24
- Annonse -

– Det vil ta lang tid å få varsla pårørande, seier politiet.

Torsdag morgon omkom ein person i ei ulukke på Stordabrua, etter at ein gjenstand fall frå ein trailer som trefte ein varebil. Ein passasjer blei uskadd i ulukka.

No stadfestar politiet at den omkomne er ein mann i 40-åra frå Litauen.

– Han skal ikkje ha noko familie i Norge, seier operasjonsleiar Kurt Løklingholm ved Sørvest politidistrikt.

Sidan den omkomne er frå utlandet vil det ta lang tid å få varsla pårørande, seier Løklingholm.

– Det tar mykje lenger tid. Då må det gå forbi oss til Kripos og til den aktuelle etaten i utlandet. Så skal dei igjen iverksetje varsling, så sånne ting tek tid.

- Annonse -

Jobba for Stord-firma

Den omkomne var fast tilsett i Malerfirma O. Kjelsnes AS frå Stord.

– Me mottok beskjeden i dag tidleg klokka sju at ein av våre tilsette hadde vore involvert i ulukka. Me stansa då alt føreståande arbeid, og alle dei tilsette blei kalt inn på kontoret. Me fekk samla alle for å gi dei best mogleg oppfølging etter at dei har opplevd at ein arbeidskollega mista livet, fortel Rune Kjelsnes som er ein representant for selskapet.

Kjelsnes ønskjer at namnet på malarfirmaet kjem fram, for å sleppe spekulasjonar om kva firma som var involvert i ulukka.

Han fortel at dei vil ha ei ny samling for kollegaer i kveld.

– Dagen har vore sterkt prega av det som har skjedd. Me kjem til å samle alle kollegaaen på nytt i kveld. Me ønskjer å uttrykkje stor medskjensle med familien til han som mista livet, seier Kjelsnes.

Minnesmarkering

Politiet opplyser at det vil blir avholdt ei minnesmarkering på ulukkesstaden torsdag kveld.

I samband med dette vert Trekantsambandet stengt mellom klokka 18.10 og 18.25.