Timelapse Stord + Fitjar

For nokre veker sidan vart eg endeleg ferdig med mitt aller første timelapse-prosjekt, og no har eg omsider bestemt meg for å dele det med dåke. Dette er eit langtidsprosjekt som eg har jobba med i tilsammen 3,5 år. Prosjektet viser Stord frå ulike sider og vinklar gjennom alle dei 4 årstidene. Det ferdige resultatet består av nærare 600.000 bildefiler som er blitt knipsa gjennom natt og dag, og på kryss og tvers av heile øya. Lågt og høgt.-SJÅ I HD for best kvalitet.-NB! Eg har lovlig lisens på all musikk som er brukt i videoen.

Posted by Ottesen Foto on Thursday, March 30, 2017
- Annonse -

Den unike time-lapse-filmen frå Stord er sett saman av til saman 600.000 enkeltbilete.

Kristine Bakken Ottesen jobbar til dagleg i barnehage, i tillegg til at ho driv på med portrett-fotografering. Men på fritida har ho arbeidd med eit videoprosjekt som ikkje akkurat er kvardagskost for fotografen frå Stord.

Videoen ho no er ferdig med, etter 3,5 år med arbeid, består av svimlande 600.000 bildefiler. Dag og natt har ho stått ute, på kryss og tvers på heile Stord-øya gjennom alle årstidene.

Stor lidenskap

– Eg har jo lenge hatt ein stor lidenskap for fotografi. Då eg gjekk på skule i England så lærte eg utruleg mykje om faget og deretter berre veks interessa for det.

Foto: Kristine Bakken Ottesen

–  Læraren me hadde då viste oss ein time-lapse-film som han hadde laga, og etter å ha sett den blei eg så fascinert at eg bestemte meg for at eg skulle laga ein sånn film sjølv ein gong.

- Annonse -

– Korleis har det vore å bruke så lang tid på prosjektet?

– Eg har jo ikkje jobba konstant med det heile tida desse tre åra. Det har vore prosjekt som har vore litt meir på sida av andre prosjekt, som eg har jobba med når eg har hatt litt ekstra fritid.

Tålmodsprøve

Ottesen vedgår at det ikkje alltid har vore like kjekt å stå ute i timesvis, både dag og natt, for å gjere arbeidet som måtte til.

– Det tek ganske lang tid å lage filmsnuttar av bildefiler, så tålmodet har blitt sett på prøve eit par gongar, og eg har brukt mange timar ute til alle tider på døgeret for å prøve å få med det meste som øya har å by på.

Time-lapse-fotografering er ein teknikk der bildesekvensen er mykje lågare enn i ein vanleg video, og deretter spelt av i normal hastigheit. Teknikken gjer at det er mogleg å sjå ting som vanlegvis er vanskeleg å sjå for det menneskelege auga, som når sola og stjernene flytter på seg.

 

- Annonse -