Fylkesnes Bil selte totalt rundt 1500 bilar i fjor, dersom ein tek med dotterselskapet Bauge Auto i Haugesund. Foto: Fylkesnes Bil
- Annonse -

Dei tre bilforhandlarane på Stord har alle hatt ein god vekst i nybilsalet. Totalt vart det selt 666 nye bilar på Stord i fjor.

Ford-forhandlaren Sunnhordland Bil på Vabakken opplyser at dei i fjor selde 147 nye bilar, ei sterk auke frå året før, då dei selde 109 bilar.

65 av desse er varebilar og 82 personbilar. Den mest populære bilen hos bilforhandlaren på Vabakken vart i fjor Ford Fiesta.

– Me hadde eit veldig bra nybilsal i fjor. Me har eit jevnt sal av dei fleste modellar, men det er Ford Fiesta som ligg på topp når det gjeld personbilar, opplyser Thor Egil Vaage i Sunnhordland bil AS.

Det gode salet fører naturleg nok til sterk vekst i omsetnaden.

– Me har i 2017 auka omsetnaden med rundt åtte millionar kroner, og ser ut til å passere 50 millionar i total omsetnad. Me ligg også an til eit positivt resultat, seier Vaage.

– Godt nøgd med salet

- Annonse -

Opel-forhandlaren Heiane Bil kan også skilte med gode salstal for fjoråret. Dei enda med 135 nye bilar, 26 fleire enn året før. Bestseljaren her vart Opel Mokka X, med 25 leverte bilar.

– Me er godt nøgd med salet i 2017, både når det gjeld nybilsal og bruktbilsal, seier dagleg leiar i Heiane Bil, Kjetil Skulstad.

Som vanleg er det ingen bilforhandlarar i regionen som kan måle seg med volumet til Fylkesnes Bil. Dei selde i fjor heile 384 nye bilar, altså eit snitt på meir enn éin bil om dagen gjennom heile fjoråret. Dette fordeler seg på 148 av merket Peugeot, 143 Mercedes Benz-bilar og 93 Mitsubishi’ar.

– Nybilsalet gjekk veldig bra i fjor. I antall var med på linje med 2016 på personbil, men litt auke på varebil, opplyser økonomiansvarleg i Fylkesnes Bil, Jonas Engelsen Landro.

Outlander mest populær

Mitsubishi Outlander vart den mest selte nybilen på Stord i 2017. Foto: Mitsubishi

Den mest selte bilmodellen på Fylkesnes Bil var Mitsubishi Outlander, med 63 selte bilar. Dermed er også den bilmodellen som er mest selt på Stord.

I tillegg selte bilforhandlaren på Stord 547 bruktbilar, noko som gjer at det samla talet på nye bilar kjem på 931.

Fylkesnes Bil hadde ein total omsetnad for Stord på rundt 260 millionar kroner, ein liten auke frå 2016 då bilforhandlaren omsette for 257 millionar kroner.

I tillegg hadde underselskapet Bauge Auto i Haugesund ein omsetnad på 140 millionar, ein vekst på rundt fem prosent frå året før.

– 2017 ser ut til å bli det sterkaste året me nokon gong har hatt, seier Landro.

- Annonse -