Vengjespissen går akkurat klar taket på bankbygget i Fitjar. Foto: Kjetil Rydland.
- Annonse -

I går kveld kom vengjene til den første av dei nye møllene i Midfjellet, og dei gigantiske vengjeblada måtte lirkast med list og lempe gjennom Fitjar sentrum.

Av: Kjetil Rydland, Fitjarposten

Transporten i går passerte i «fint driv» ikkje så langt under fartsgrensa og utan komplikasjonar av noko slag. Den mest spektakulære transporten skjer i kveld, når dei tre vengjeblada skal til fjells. Då den første vengja nærma seg, hadde det samla seg ein god del skodelystne, som følgde spent med.

– Går dette bra? Tar vengjespissen med seg flaggstonga eller taket på bankbygget?

Etter at det svære vogntoget hadde vore ein tur ute på plenen, svinga det elegant det svære møllebladet på 58,5 meter gjennom den krappe svingen i Sentrum. Og så gjekk det radig vidare oppover forbi kyrkja og opp til Rimbareidfeltet, der politiet takka for seg og sette kursen mot Eldøyane for å eskortera neste transport.

- Annonse -
Det er lite plass til overs i Sentrum når politiet og Klepp Spesialtransport kjem med vindmøller. Foto: Kjetil Rydland.

Transporten vidare oppover fjellet såg ut til å vera rein plankekøyring, og no er møllebladet i ferd med å slå lag med «frendane» sine oppe i Midtfjellet.

- Annonse -
- Annonse -

Dagleg leiar i Midtfjellet Vindkraft, Erik Mortensen, fortel at kvar turbin utgjer seks billass. Fram til slutten av juni vil me oppleva 66 slike store transportar før alle dei nye møllene er på plass i fjellet.

Dermed vil me få rikeleg høve til å beundra dei enorme mølledelane. Men me minner publikum på å ta omsyn, og ikkje koma i vegen for det spanande arbeidet til transportørane.

Transportøren kom seg ikkje rundt den krappe svingen utan å trakka på plenen. Foto: Kjetil Rydland.

- Annonse -