- Alltid kjekt å dela ut medaljar, fortel Christoffer Knutsen. Foto: Ingrid Hovstad
- Annonse -

– Eg vart veldig overraska, og skjønte no ikkje heilt kvifor eg skulle få noko medalje, småler Jakob Hovstad. Han vart i dag tildelt to medaljar frå det norske forsvaret.

3. februar 1948 reiste Jakob Hovstad til Tyskland for å tenestegjera i Tysklandsbrigaden. Saman med om lag 50.000 tenestegjorde Hovstad i landet etter andre verdskrig. Noreg deltok i dei allierte sin okkupasjon av Tyskland frå 1947 til 1953.

I dag fekk han besøk i stova si av Christoffer T. Knutsen. distriktsjef for Bergenhus heimevernsdistrikt 09 (HV-09), og distriktssersjant Olav Haugsdal frå Bergenhus heimevernsdistrikt 09 for Hordaland og Sogn og Fjordane.

Hovstad fekk forsvaret sin medalje for internasjonale operasjonar, for sin teneste i Tysklandsbrigaden, brigade 481. Diplomet som følgde med medaljen var underteikna av Forsvarssjef, og firestjerners admiral, Haakon Bruun-Hanssen. I tillegg fekk han Tysklandsbrigaden sitt veteranforbund sin medalje.

Gledeleg overraska

Det var ein tydeleg rørt Jakob Hovstad som i dag tok i mot medaljane føre familiemedlemmar, og kona han har vore gift med i nær 68 år.

– Dette er det løgnaste som har skjedd meg, men det var skikkeleg koseleg, fortel 92-åringen, som takka dei to offiserane fleire gongar.

- Annonse -
- Annonse -

Han vart svært overraska når det dukka opp eit brev i postkassen om at han skulle få medalje.

– Svigerdottera mi sendte inn skjema til Forsvaret på mine vegne. Ho vart inspirert når ho las i Sunnhordland om tildelinga til Einar Kyvik på Leirvik, og tenkte at eg ogso burde heidrast. Ho sa ikkje noko til meg om kva ho hadde gjort, so for meg kom brevet heilt ut av det blå, fortel Hovstad.

– Forsvaret sine register er mangelfulle, so difor set me stor pris på at folk søkjer. Dette er første gongen me er på Fitjar, men me kjem gjerne fleire gongar om det er fleire som burde heidrast, fortel Knutsen.

Stolt 92-åringen med diplom og medaljar. Foto: Ingrid Hovstad

Hugsar godt

Jakob Hovstad nærmar seg 93 år, og helsa er ikkje det den ein gong var.

- Annonse -
Kameratskapen er det Besten hugsar aller best. Mange møtte han att på øvingar med HV nokre år seinare.

– Heldigvis har eg hugsen, og auge til å lesa med, humrar han i frå godstolen. 92-åringen hugsar nemleg månadane i Tyskland som om dei fann stad i går. Spesielt godt hugsar han kor fælt det var å sjå dei store øydeleggingane etter krigen, besøket i fangeleiren Bergen-Belsen og ein byttehandel som gjekk skeis.

– Men det eg hugsar aller best er kameratskapen, og kor kjekt me hadde det i lag i kompaniet, fortel Hovstad.

Greit i bøtter og spann

Jakob har fleire mindre hyggelege minner frå Tyskland. Han fortel om ubehaget etter 40 dagar på storøving med dei allierte, og om når ein i kompaniet drukna medan dei øvde til å ta idrettsmerke. Aller verst inntrykk gjorde turen til fangeleiren Bergen-Belsen.

– Eg grein i bøtter og spann av forteljingane me fekk om dei forferdelege tinga som hadde skjedd der.

Heldigvis er det minna om kor kjekt dei hadde det i lag i kompaniet som er i fleirtal.

– Ja det eg hugsar aller best er kameratskapen, og dei gode sitronkakene me kunne kjøpa i kantina. Me fekk berre kjøpa to stykke og heile løna gjekk i det, men om eg spelte trekkspel fekk eg eit stykke til frå damene i kantina, ler Besten.

Sitronkakestykka kom godt med, for det var ikkje rare rasjonane med mat dei fekk. Ei skive loff til frukost og ei og ei halv til lunsj. Til middag var det litt potetstappe og eit minimalt stykke med kjøt.

I forkant av tildelinga fekk underteikna skriva ned nokre av dei mange historiene Jakob Hovstad, eller som eg kallar han «Besten», har i frå tida i Tyskland. Heile intervjuet med bilete kan du lesa her:  Hugsar Tyskland på godt og vondt.