BOKAKTUELL: Ingvild Lothe ga nyleg ut romanen "Havfruehjerte" og har fått god omtale frå fleire store aviser. Foto: Privat
- Annonse -

Ingvild Lothe (29) frå Stord har alltid vore glad i å leike med ord. No er ho klar med sin første eksperimentelle roman.

– Boka er nok ikkje typisk bestseljar-litteratur, men det har ikkje vore målet mitt heller. Eg likar å skrive om ting som gjerne er litt «off», seier Stord-forfattaren.

For tre år sidan debuterte ho med si første diktsamling på Kolon forlag. No er Ingvild Lothe klar med romanen Havfruehjerte – ei bok som handlar om djupe kjærleiksforhold, ambivalente kjensler, miljøkritikk og avhengighet.

Diktboka i 2016 blei omsett til tysk og svensk, seld i 4000 eksemplar, og hausta god omtale frå blant anna Morgenbladet og Bergens Tidende. Men også den nye boka har falt i god smak hos bokmeldarane.

Å tøye grensene

VG skildrar blant anna Havfruehjerte som «herleg småfrekt», og gir den terningkast fem av seks:

Forfatteren går ikke av veien for å bruke tradisjonstunge sentrallyriske rekvisitter som himmelen, stjernene, havet (med tilhørende marinbiologi), barnet, blomster og trær. Men hun håndterer dem på sin egen måte, i overraskende stemningskast og billedkollisjoner, gjerne litt skjevt og herlig småfrekt. – Arne Hugo Stølan, VG.

- Annonse -
- Annonse -

– Prosjektet har teke ganske lang tid, og då er det sjølvsagt kjekt å sjå at boka blir godt motteke. Eg blir ikkje akkurat lei meg av god omtale, glimtar Lothe til.

Forfattaren er sjølv opptatt av det ho kallar «det poetiske bilete», og trivst aller best når ho får lov til å tøye grensene for språket så langt som mogleg. Målet er å vekke kjensler hos lesaren og få dei til å sjå på livet på ein ny måte.

– Den førre boka mi var veldig direkte og enkel å forstå. Denne boka består av fleire lag, der eg leikar med språket. Då blir ein mykje friare i skriveprosessen. Alt kan på ein måte skje, og prosessen blir veldig lærerik på eit menneskeleg nivå.

- Annonse -

Vekk med «flinkis-prosa»

Den 29-år gamle forfattaren, som er oppvaksen på Stord, bur i dag i Oslo og pendlar til Gøteborg for å fullføre ein master i Litterär gestaltning. I slutten av november ventar ho sin første gut, og er for augneblinken midt i ein flytteprosess.

Det er med andre ord mykje som har skjedd sidan debuten i 2016, og forfattaren opplever sjølv at ho har endra seg sidan den første boka.

– Eg er blitt eldre og forhåpentlegvis betre. Eg merkar at det er noko som har løsna med dette prosjektet, og at eg har hatt ein heilt anna fridom i skrivinga denne gangen, seier Lothe til Stord24.

– Men korleis vil du eigentleg skildre deg sjølv som forfattar?

– Eg vonar at eg blir sett på som ein eksperimentell forfattar. Mange bøker er godt skrive, men du hugsar dei gjerne ikkje i etterkant. Fortellingane er så like. Eg har ikkje lyst til å skrive sånn «flinkis-prosa», slår ho fast.

– Eg vil heller vere ein interessant forfattar enn ein flink forfattar.

- Annonse -