Foto: Privat.
- Annonse -

Frida Pedersen Nygård (23) frå Stord har publisert si første låt på Spotify. Draumen er å ein gong gi ut ei plate.

Guns N’ Roses sin evige slager frå 80-talet, «Sweet Child O’Mine» har fått eit nytt liv i Frida Pedersen Nygård si coverversjon som ho no har publisert på Spotify, iTunes og Soundcloud.

Med hjelp frå tidlegare klassekamerat på musikklinja, Alf Vaksdal, spelte ho inn songen i eit tomt symjebasseng for å få den perfekte akustikken.

– Sårt

– Eg har høyrt på Guns N’ Roses i mange år, men har kanskje ikkje studert musikken så nøye. Så var det ein dag eg høyrde ekstra godt etter på denne songen, og synest det var noko sårt over den teksten, og då prøvde eg å laga min eigen versjon.

Høyr låta her:

- Annonse -

Som songar har Frida ei lang CV å vise til. Ho byrja med song i kulturskulen då ho var 8-9 år gammal, og song i både Aspane barnekor og i Stord ungdomskor, samt ein periode i Norges ungdomskor. Etter å ha fullført musikklinja på Stord sturte ho song på Tonheim folkehøgskule. Det er difor ingen som kan skulde ho manglande erfaring når ho no gir ut songane sine.

– Eg har hatt eit ønske om å nå ut til eit litt større publikum, då eg synest veldig gøy å synga. Dette er eit viktig steg på vegen, og noko eg gjer med skrekkblanda fryd, seier 23-åringen.

Vil stå på eigne bein

Ein skulle tru at ein songar med ei slik stemme hadde prøvd seg på både Idol og Norske Talenter. Men dette er ikkje noko for 23-åringen, som til dagleg jobbar i arkitektfirmaet JK Arkitektur på Stord.

– Eg trur kanskje fordi eg treng å vite at eg gjer dette for min eigen del. Og at alt som blir sagt og gjort kjem frå meg og ikkje gjennom andre kanalar. Det er ein meir audmjukt og ærleg måte å marknadsføre seg sjølv på.

– Kva ambisjonar har du for musikken framover?

– Eg vonar at eg kan helde fram med å lansere nye låtar. I første omgang blir det nok litt fleire cover-låtar, og etterkvart kanskje noko eg har laga sjøl. Det er absolutt ei draum å gi ut ei plate ein gong.

Konsertar

Av førebilete nemnar ho Aurora, Highasakite og Susanne Sundfør. Førebels syng ho mest i bryllaup og selskap, men er ikkje framand for å stå på scenen for eit større publikum.

– Dersom folk har lyst å koma stiller eg gjerne opp.

- Annonse -