Havforskningsinstituttet har teikna dette kartet, der dei gule flekkane markerer mykje bos, og dei raude veldig mykje bos. Kart: Havforskningsinstituttet
- Annonse -

Havforskningsinstituttet har teikna opp dette kartet, der ein kan sjå kvar det er mest sannsynleg at bos har flote inn mot land.

Ved å studere havstraumane langs kysten har havforskarane teikna opp eit kart der det er mest sannsynleg at plast og anna bos har flote inn i fjæra langs kysten.

Det gule feltet på kartet markerer stader der det sannsynlegvis er mykje bos, og dei raude markerer veldig mykje bos.

– Dei raude flekkane syner strender der det er størst sannsyn for å finna store mengder avfall, medan dei gule flekkane indikerer at det også her er søppel å finna, forklarar seniorforskar Bjørn Einar Grøsvik, til NRK Hordaland.

Eldøyane og Sagvåg verst

Som ein ser rundt Stord-øya på kartet så er det nokså mange stadar der det er markert med gult. Stadane det er verst med plast og bos er rundt Eldøyane og i Sagvåg. Kartet viser også tydeleg at det er på vestsida av Bømlo der situasjonen er aller verst med tanke på forsøpling.

- Annonse -

På Stord og elles langs kysten har det i år vore eit stort engasjement for å rydde bos frå strendene. Eit engasjement som starta etter at ein kval stranda på Sotra med 30 plastposar i magen.

Det er ei eiga Facebook-gruppa på Stord som organiserer ryddeaksjonar, og det er høve for lag og organisasjonar å søkje om støtte frå SIM til ryddeaksjonar.

Kjekt å rydde

– Eg plar tenkja på at kvar plastbit eg plukkar opp er ein plastbit som ikkje hamnar i magen til ein fugl. Det gir ei god kjensle. Samtidig har me det veldig gøy i lag. Me lagar det til ein gøy tur og det er ein fin måte å bli kjend med nye folk på, sa organisator Ottar Tvedten tidlegare i vår.

Stord kommune gjekk første helga i mai saman med Ragn Sells, SIM og Friluftsrådet Vest om å arrangere ein felles ryddeaksjon, der det vart sett av containarar fleire stadar.

Det byr seg ein ny sjanse for ein skikkeleg dugnadsinnsats neste veke, då det er duka for nasjonal strandryddeveke frå 2. juni til 7. juni.

Tidlegare ordførar Harry Herstad, rådgjevar idrett – og friluft i Stord kommune, Sylve Rusten, Viljar Rusten Steinsvåg og styreleiar i Friluftsrådet Vest, Astrid Larsen, under ryddeaksjonen som kommunen arrangerte i starten av mai. Foto: Sylve Rusten

- Annonse -