For to veker sidan fekk Bjørn Furre og Asmund Aasheim frå Stord tak i ei diger makrellstørje på nesten 240 kg utanfor Austevoll. Foto: Privat
- Annonse -

Så langt i år har sportsfiskarane frå Stord vore med å merka fire makrellstørjer. No håpar dei å kunne delta i nok eit banebrytande prosjekt som skal redde den utrydningstruga arten.

Jubelen stod i taket då Bjørn Furre og Asmund Aasheim var ein av få som fekk løyve til å merke makrellstørja av Fiskeridirektoratet i fjor.

Saman med kaptein Morten Ruud på båten «Offshorehunter» har dei det siste året seilt over 1000 nautiske mil frå Austevoll for å kartlegge den store beinfisken.

I går kunne avisa Sunnhordland melde om at fiskarane hadde fått ein fangst på 2.34 meter og nærare 240 kg, etter ein kamp på over ein halvtime.

No kryssar kameratane fingrane for at dei får lov til å vere med på eit nytt prosjekt i regi av Havforskingsinstituttet til neste år.

Skal ta i bruk nytt satelittsystem

Målet er å feste GPS-baserte sendarar på fiskane, som kan lese av reiseruta og gi nyttig kunnskap om kvar fisken kjem frå. Dette vil igjen kunne føre til auka kvoter for Noreg som fiskerinasjon.

- Annonse -

– Me reknar det for overhengande sannsynleg at me kjem med der, då me er blant dei i Noreg som har mest erfaring med «norsk makrellstørje» og fiskemetodar. I tillegg bur me midt i smørauga for makrellstørjefiske, opplyser Aasheim til Stord24.

Berre fire sportsfisketeam har i år fått lov til å fiske etter størje i samband med ein merkeprosjekt, der fiskane får festa eit såkalla spagettimerke like under ryggfinna.

Furre og Aasheim har så langt merka tre størjer utanfor Bakkasund på Austevoll, samt ein på Hitra i Trøndelag.

Asmund Aasheim (f.v.) og Bjørn Furre. Foto: Privat

Hevdar bestanden kjem til å auke

For to veker sidan kunne dei observere heile 33 «kok» på det meste utanfor Austevoll – eit tydeleg teikn på at bestanden er i ferd med å auke, skal ein tru fiskarane.

– Når me såg det hoppa og kokte med størje, gjaldt det å kome seg i posisjon så raskt som mogleg. Dette skulle vise seg å vere enklare sagt enn gjort. Gong på gong dykka dei ned på djupt vatn når me hadde 50 meter att til stimen, seier dei.

– Forhåpentligvis kan me igjen sjå kokande størjestimar i Sunnhordlandsbassenget i løpet av nokre år. Då byrjar det å nærme seg gamle dagar.

Fiskekameratane blei vitne til store mengder makrellstørje ved Bakkasund. Foto: Privat

Vil ha meir til sportsfiske og småbåtar

Den norske kvoten på makrellstørje var i år på 239 tonn. Av desse er det berre 50 tonn som er tekne no når sesongen går mot slutten, ifølgje Fiskeribladet.

Det betyr i praksis at 200 tonn står ufiska. Ein del av desse kunne godt ha vore sett av til sportsfiske, meiner fiskarane frå Stord.

– Fiske bør etter vår meining drivast i småskala for å ikkje overflaume marknaden med fisk. Notbåten «Brennholm» fekk 90 størjer i eitt kast, der kiloprisen enda på nærare 103 kroner per kilo. Dette er latterleg lågt, seier Aasheim.

– Eit organisert stongfiske med charter er vegen å gå for å få maksimal verdiskaping. I tillegg bør resten av kvoten setjast av til dei små båtane i kystnotflåten. Ikkje dei store havgåande ringnotsnurpane som allereie veltar seg i sild, makrell og store pengar der.

- Annonse -