Det offentlege biblioteket på Stord har vore koronastengt i over ein månad. No skal lesarar endeleg få låne bøker att, men på ein noko anna måte.
– Etter mønster frå mange bibliotek får no også Stord folkebibliotek ei ordning med «drive in»-bibliotek, opplyser biblioteksjef Bjørnar Withbro.
Fram til biblioteket kjem i normal drift att, kan lånarar med lånekort bestille fire media kvar over e-post.
– Biblioteket registrerer så utlån og lånarane får lang lånetid. Lånte media kan hentast ein gong i veka framfor Kulturhuset, opplyser biblioteksjefen.
Tidspunktet for henting av bøker blir torsdagar mellom klokka 13 og 15. Biblioteket vil då legge bestilte bøker og anna media i poser med namnet på den som lånar.
Biblioteket har ikkje høve til til å ta imot media for innlevering før det er kome i normal drift att.
For dei som var heldige å låne bøker rett før koronakrisa, kan desse lånarane gle seg over å ha ekstra god tid til å lese seg ferdig. Biblioteket vil nemleg ikkje sende ut purringar så lenge stenginga varer.
– Me gler oss til dette er over og at me kan opne opp att for våre brukarar.
