Det er nok ikkje kvar dag Sagvåg får besøk av eit militærhelikopter frå Vietnam-krigen. Foto: privat
- Annonse -

Stord Bildemontering hadde i går eit noko uvanleg kundebesøk. Oljemillionæren Stig Bakke frå Ålgård kom eins ærend med eit helikopter frå Vietnam-krigen for å henta ein bakaksling.

Thor Jarle Slevigen i Stord Bildemontering i Grunnavågen fekk førre veke ein container med bilar og bildeler frå statane. Då fatta kameraten hans Stig Bakke frå Ålgård interesse. Ein bakaksling frå Corvette var nemleg perfekt for Chevrolet-pickupen frå 1950-talet.

Men å køyra den tre timars strekninga frå Ålgård til Stord var ikkje aktuelt for oljemillionæren frå Jæren. Han kom heller eins ærend med militærhelikopteret sitt frå 1960-talet, som stammar frå Vietnam-krigen.

– Når eg fortalde at eg hadde skaffa han bakakslinga, så ringde han meg i førre veke og spurte om eg hadde landingsplass for helikopter, seier Sleivigen.

Då var grusplassen i Grunnavågen ideell, og rett som det var kom Bakke med helikopter og eit reisefølgje på 4-5 på snarvisitt i går.

– Eg veit ikkje kvifor han kjøpte dette, men for alt i verda så har han klart å skaffe seg eit krigshelikopter frå Vietnam.

- Annonse -
Stig Bakke kjøpte Vietnam-helikopteret i 2012. Prisen vil han derimot ikkje seie noko om. Foto: privat

Helikoptereigar Stig Bakke fortel til Stord24 at det ikkje var noko spesielle årsaker til at han valde å ta helikopteret med på handleturen.

– Eg har jo dette helikopteret, så då var det naturleg å bruka det. Men som oftast nyttar eg det når eg skal syne det fram på utstillingar, seier Bakke til Stord24.

Nostalgi

Helikopteret er av typen Bell UH1-E Huey, eit kamphelikopter som var i bruk i Vietnam-krigen.

– Det er eit superflott helikopter med mykje nostalgi. Det var nytt i 1967, og i bruk i Vietnam-krigen fram til 1970.

– Kvar kjem denne interessa frå?

– Interessa har alltid vore der, og eg har eigd helikopter sidan 2009. Men dette kjøpte eg i 2012 då eg tilfeldigvis kom over det. Det var historien og alt bak det som gjorde at eg skaffa meg det, seire Bakke som fortel at han fekk det over på norsk register i fjor.

Kundar frå heile Norge

Sjølv om dei færraste kjem med like spenstige transportmidlar så kan Sleivigen i Stord Bildemontering fortelja om kundar frå heile Norge. Spesielt Amcar-bilar og -utstyr er noko etterspurnaden er stor etter.

– Me har mange kundar langvegsfrå når det gjeld Amcar. No fekk eg nett inn tre veldig spesielle bilar, og den eine kjøparen høyrer til så langt i Nord-Norge du kan koma. Han skal ta Hurtigruta heim med bilen. Ein annan Dodge Challenger skal til Kristiansand. Og ikkje minst så har eg ein Dodge frå 70-talet som ei dama frå Os skal eige og ha som konebil.

Men lokalinteressa er også til stades. Til dømes er det ein stordabu som no ventar på ein Corvette frå 2008 til over ein million kroner.

- Annonse -