Øystein Heide Aadland (f.v.) og Joakim Vikanes er klar for konsert i huset til Sivertsen neste helg. Foto: Kari Mendelejev von Svanberg.
- Annonse -
- Annonse -
- Annonse -

Søndag 30 juli skal musikarane ha konsert i kunstnarbustaden til Kenneth Sivertsen. Dei lovar ei oppleving litt utanom det vanlege.

– Me ynskjer å prøve noko nytt denne gongen. Tanken er at det skal bli ei slags utstilling heller enn ein vanleg konsert. Det blir på ein måte som eit ope hus der folk kan kome og gå, medan me spelar musikk, seier Øystein Heide Aadland (23) og Joakim Vikanes (22).

Før konserten skal dei bu i kunstnarbustaden til Kenneth Sivertsen i ei heil veke. Planen då er å skrive eigenkomponert musikk – som forhåpentlegvis kan framførast på søndagen.

Uformell stemning

– Er det ikkje litt risky å skulle arrangere ein konsert utan å ha klart eit repertoar på førehand?

– Det er klart det er ei utfordring. Men me synest det er kjekt å kunne gjere ein annleis konsert. Til vanleg blir jo folk sittande stille i gjerne halvanna time for å høyre på. Så går dei att. Me vil få til ei litt uformell stemning der folk kan gå rundt og prate og ta seg ein kopp kaffi, seier dei.

- Annonse -
- Annonse -

Konserten vil vare i fire timar. Duoen understrekar likevel at folk kan kome når dei vil.

– Det er ikkje forventa at folk skal vere til stades frå start til slutt, altså, opplyser Aadland.

Tidspunkt for konserten er foreløpig ikkje annonsert.

Flyttar inn for å arbeide

Det er ikkje første gong musikarane har konsert i bustaden til Sivertsen. For to år sidan opptredde dei der for eit utseld publikum, den gong med tredjemann Gunvald Ottesen, under trionamnet EIK.

Då tolka dei låtar frå den kjende musikaren sjølv og overnatta i bustaden mellom konsertane.

- Annonse -

No har dei tenkt å bruke mesteparten av tida i bustaden på å førebu seg fram mot konserten.

– Det høyrest kanskje litt pompøst ut å skulle flytte inn der og skrive musikk. Men det er noko spesielt med det å flytte inn ein plass for å arbeide. Det skaper rett og slett litt press på å faktisk produsere musikk, meiner Aadland.

Foto: Kari Mendelejev von Svanberg.

Huset til ein komponist

Duoen legg ikkje skjul på at det ligg mykje ærefrykt bak det å spele i bustaden til Sivertsen.

– Første gong me gjekk inn i huset var det ei spesiell stemning. Det stod masse gamle notar rundt omkring og det låg fullt av CD-ar på bordet, seier Vikanes.

– Me merka då me spelte den første konserten at me spelte musikken til ein komponist, i huset hans, framfor folk som kjende han og musikken hans mykje betre enn oss.

Kva blir trekkplasteret til konserten då – de eller huset til Sivertsen?

– Kanskje begge deler? Mest oss, trur eg. Det blir jo litt som konserten på fjellet på Tysnesfest. Musikken tiltrekker, men også utsikta og omgjevnadane, seier Vikanes.

Kanskje det er det neste prosjektet? Ein konsert i tårnet på Stovegolvet?

– Eg har i alle fall veldig sansen for slikt, uttalar Aadland.

- Annonse -