Elektrisk med Andreas Wahl kjend frå NRK kan du få med deg søndag kveld i Stord kulturhus.
- Annonse -

Fredag kveld kl. 20.00 kan du få med deg konsert med Heine Totland’s Sensational Rock Circus på Arena. Arrangøren skriv følgjande om bandet: «Denne humørpillen av et band får stemningen i taket, og er perfekt for en festkveld folk i alle aldre! Med spilleglede og smittende energi, serveres de beste Rock & Roll-låtene fra 50- og 60-tallet!» Heine Totland, som kjem frå Bømlo, hadde i 2010 stor suksess med musikalen Buddy Holly på Folketeateret i Oslo.

På laurdag er det på ny klart for kulturkafé i regi av Internasjonal kulturklubb. No er det portugisisk mat som står på menyen. Det heile går føre seg i kjellaren i Stord kulturhus frå kl. 11-15, og er eit fint høve til å bli kjend med nye stordabuarar, frå alle verdas hjørne.

Osvald arrangerer ny ettermiddagskonsert laurdag kl. 16. No er det engelskfødde Claudia Scott som skal gå på scenen. Ho har spelt på Osvald tidlegare, noko som var ein svært bra konsert ifølgje arrangørane: «For eit par år sidan spela ho ein tvers gjennom magisk solokonsert hjå oss, for ein musestille fullsatt Osvald pub. No er endeleg dronninga av norsk americana attende. Denne gongen med band og nok eit strålande nytt album i veska; Let the ribbons fly kom i fjor haust, til unison kritikerhyllest landet rundt.»

For dei korpsinteresserte er det også høve til å få med seg ettermiddagskonsert laurdag. På Grand Hotell skal Langeland skulekorps saman med Stord musikklag spele konsert i festsalen. Konsertstart er kl. 14:00, og det er gratis inngang.

Søndag kan du få med deg eit forrykande show med Andreas Wahl kjend frå NRK. «Elektrisk Wahl» heiter showet, og i framsyninga viser Wahl deg kor fantastisk vakker, dødeleg og kvardagsleg elektrisitet kan vera. Han tar deg med på ei reise fylt av spektakulære, vitskaplege demonstrasjonar og opplevingar som får håra til å reisa seg. Det heile går føre seg i Stord kulturhus søndag kveld kl. 18:00, og passar for vaksne og barn frå 10 år.

- Annonse -

I Nysæter kyrkje kan du søndag kveld få med deg konsert med vokalensemblet mMokkat, som feirar 10 års jubileum. Stord Gitartrio skal også vere med på konserten. Det heile startar kl. 19:00, og inkludert i billetten på 200 kroner får du servert kveldsmat.

Som vanleg i helgene har Stord kino eit bredt kinotilbod. Denne helga er det éin Norgespremiere, det er sci-fi-thrilleren «Life», med Ryan Reynolds og Jake Gyllenhaal. Filmen handlar om kva som skjer når eit forskningscrew finn liv på mars. For heile kinoprogrammet, sjå Stord kulturhus sine nettsider.

Har me gløymt noko? Gi oss ein lyd på redaksjonen@stord24.no.

- Annonse -