Linda Hellesund og Kjell Arne Skålevik driv Sagvågståvo kafé i Sagvåg.
- Annonse -

Sambuarparet Linda og Kjell Arne ønskjer å opne kafeen sin på julaftan for at einsame skal ha nokon å feire jul saman med – men få tek kontakt.

Linda Hellesund og Kjell Arne Skålevik driv Sagvågståvo kafé i Sagvåg, og byr i år på julemiddag med pinnekjøtt og riskrem på julaftan for dei som saknar nokon å feire jul saman med.

– Me veit jo at det er mange som sit aleine på julaftan. Difor ønskjer me å tilby julemiddag der folk kan sitje saman rundt eit bord. Me driv ikkje berre pub og kafé, me driv sosialkontor også. Etter kvart har me jo blitt veldig godt kjent med gjestane som går her, så då veit me at nokre sit aleine, seier kafé-innehavar Linda Hellesund.

Berre éin påmeldt

Men så langt er det berre éin person som har meldt seg på julefeiringa. Hellesund veit ikkje heilt korleis ho skal tolke det.

– Eg veit ikkje om ein skal tolke det poisitivt ved at det ikkje er så mange einsame på Stord, eller om det er fordi det sit langt inne for folk å melde seg på noko sånt. Blir det ikkje fleire enn den eine gjesten tek med han med til oss og feirer jul heime.

Sjølv om fristen for julefeiringa eigentleg gjekk ut i går, oppmodar dei framleis folk om å melde seg på.

- Annonse -

– Det er trist at ikkje fleire har meldt seg på, for eg veit det er fleire som sit aleine. Dette er heller ikkje berre for dei som ikkje har familie. Det kan like gjerne vere par som sit heime og som ikkje har barn eller barnebarn som kjem på besøk, og som har behov for litt ekstra selskap.

Treng du nokon å vere saman med på julaftan? Då kan du framleis melde deg på julefeiring hos Sagvågståvo kafé, på telefon 534 930 42.

Julefeiring hos Frelsesarmeen

Frelsesarmeen byr også på julefeiring for dei som ikkje har nokon å feire jul saman med. Men denne feiringa vil i år skje i morgon 22. desember, og det er heller ikkje for seint å melde seg på julefeiring hos Frelsesarmeen.

– Me har rundt 30 som har meldt seg på hittil i år. Dette er for dei som sit aleine i jula eller som slit med ulike ting. No er eg på veg til Spar på Ådland for å hente pinnekjøtt og råvarar, og me har ein kokk som stiller gratis opp. Så her blir det fullt juleprogram med god underholdning, seier korpsleiar Gunnar Flørenes Gundersen ved Frelsesarmeen på Stord.

Held puben stengt

I ei årrekkje har pub-innehavar Robert Delis opna dørene på Osvald pub i Leirvik på julaftan for dei som treng selskap. Men i år må han ta ein pause i tradisjonen.

– Eg har halde ope kvart einaste år i 17 år, og så blei det diverre stopp denne gongen. Denne gongen er eg vekkreist, seier Delis som seier at han har aldri opplevd at nokre andre av utestadane har ope på Leirvik på julaftan

Hamna kontaktsenter i Leirvik tilbyr julemat og hygge både 1. og 2. juledag. Dette tilbodet er berre for brukarane av senteret.

– 1. og 2. juledag har me utvida opningstider med fullt program, så brukarane våre er godt ivaretekne. Me vil tilby julemiddag og julestemning så langt pengane rekkjer, opplyser kontaktsenteret.