Anna Fiska og Maria Parr er to kjende barnebokforfattarar som skal vitje årets Falturiltu-festival.
- Annonse -

Barnebokforfattarane Maria Parr og Anna Fiske er blant forfattarane som kjem til årets Falturiltu-festivalen i november, medan Stein Torleif Bjella er musikalsk trekkplaster.

Det er snart duka for ny utgåve av den nynorske barnebokfestivalen Falturiltu, som vil gå av stabelen på Stord 4. til 10. november. Programmet er i ferd med å bli spikra, og no er det klart at to av forfattarane som vil setje preg på årets festival er Maria Parr og anna Fiske.

– Det er ei stor ære å melda  at Maria Parr og Anna Fiske er stadfesta til årets nynorske barnebokfest på Stord, melder festivalsjef Roald Kaldestad i ei pressemelding.

Kaldestad opplyser at Maria Parr (36) er blant dei mest populære barnebokforfattarane i landet, og er aktuell med den nye barneboka Keeperen og havet, ei oppfølging til debutboka Vaffelhjarte, som hausta mykje positiv kritikk i inn- og utland. Parr, som kjem frå Sunnmøre, vil mellom anna delta på ein stor konsert med Stord kulturskule i kulturhuset.

Prisvinnar

Anna Fiske (52) kjem frå Sverige, og har markert seg breidt som illustratør, forfattar og teikneserieskapar. Ho er kanskje mest kjend for Hallo-bøkene, og er tidlegare vinnar av Bokkunstprisen.

- Annonse -

– Hennar leikne, kreative nyskaping innan barnebokfeltet har gjort henne svært populær, og gjeve henne fleire høgthengande priser.

Fiske skal delta på «Stallturiltu», som er noko så originalt som ein bok- og hestefest i Stord hestesportsenter på Tyse.

Bjella musikalsk trekkplaster

Festivalforfattaren for årets festival er Per Olav Kaldestad.

Tidlegare er det kjend at visesongaren Stein Torleif Bjella vil vere musikalsk trekkplaster for festivalen med konsert på Arena.

Endeleg program for festivalen er førebels ikkje klart. Budsjettet for årets festival er tett opp under ein million kroner.