Søskena Tiril Eirunn Einarsdotter og Fridar Malmsten Steinkopf er flinke til å samarbeida på scena. I midten av juli skal dei opptre på Skånevik sin årlege Pippifestival. Foto: Malin Langøy Aarbø
- Annonse -
- Annonse -
- Annonse -

Førre helg stod dei på scene framføre 3000 under open dag på Kværner. No er søskena Tiril Eirunn Einarsdotter (19) og Fridar Malmsten Steinkopf (15) klare for Pippifestivalen i Skånevik. 

Av: Malin Langøy Aarbø

13. til 16. juli er det duka for den årlege familiefestivalen i Skånevik. Allereie no er det stor pågang på billettar til festivalen som kan by på eit tettpakka program med teater, dyrehage, festivalparade og minisirkus for born i alle aldrar.

Søskena Tiril Eirunn Einarsdotter og Fridar Malmsten Steinkopf frå Stord er blant ungdomane som skal opptre desse dagane. Dei har store forventningar til årets arrangement.

– Eg gleder meg til å dra til Skånevik. Det er alltid like kjekt. Eg har vore der inne, trur det blir sjette året på rad no. Då veit eg litt kva det går i. Det blir som ein slags ferie, uttalar Fridar (15) til Stord24.

Sjølv om rollebesetninga ikkje er heilt bestemt, kan det sjå ut til at Fridar skal spela rolla som doktoren i Emil i Lønneberget. I tillegg har han planar om å bidra med minisirkus mellom førestillingane. Tiril skal på si side inneha rolla som Krøsemaja.

- Annonse -
- Annonse -

Flinke til å samarbeida

Trass i at begge er vane med å opptre for eit publikum, er det ikkje så ofte dei samarbeider om eit felles prosjekt. Gleda var difor stor når dei opptredde føre 3000 personar under open dag på Kværner for over ei veke sidan – då med Einarsdotter på fiolin og Steinkopf på sjonglering.

– Hender det at det blir litt konkurranse dykk imellom om kven som er flinkast på scena?

– Nei, me er nok ganske flinke til å samarbeida, flirer Fridar.

Kor vidt han har nokre nye triks i ermet til Pippifestivalen, vil han ikkje seia så mykje om.

– Det er jo litt vanskeleg å koma på nye triks, då, seier han.

Sjå Fridar framføre songen «Yellow Lemon Tree» i Stord kulturhus:

Den store draumen

Tiril har ved fleire anledningar vore aktivt deltakande på ulike musikalske arrangement på Stord. Heilt sidan ho var lita har ho drive på med fiolin, dans og teater.

- Annonse -

I 2011, 2013 og 2016 kom ho vidare til landsmønstringa i ungdommens kulturmønstring. Her har ho delteke både med fiolin og som konferansier. Det siste året har ho gått på Toneheim folkehøgskule på Hamar, og skal begynna på fiolinstudie til hausten ved musikkonservatoriet i Stavanger.

– Det mest utfordrande med å spela fiolin er at det er veldig teknisk vanskeleg når ein kjem opp til eit visst nivå. Jo djupare ein går, jo vanskelegare blir det, seier ho.

Tiril Eirunn Einarsdotter. Foto: Stord kommune

Ho er likevel klar i talen på kva ho ynskjer for framtida.

– Den store draumen er å kunne leva av musikk og andre kunstformer, som dans og teater. Å kunne dela dette med andre på tvers av sjanger.

Må prioritera

Akkurat som storesøster si har Fridar ei aktiv fritid. Til vanleg spelar han fotball fem dagar i veka, han spelar saksofon fire dagar i veka og har i tillegg ein time med lærar. Dette kjem utanom fritidssysler som sjonglering, teater og ikkje minst undervisning på skulen.

Til sommaren skal han på Danacup og til Sverige på ferie.

– Det er ikkje alltid det er tid til alt. Av og til må eg prioritera, men det plar gå fint. Teater er først og fremst småprosjekt rundt sommaren eller i juletider. Fotball og saksofon gjer eg ofte, medan sjonglering som regel er hyppig øving før ein jobb. Dette gjer eg ikkje så ofte i kvardagen. Så det går på eit vis, seier han.

Bakgrunnen for sjonglering som hobby kom overraskande på.

– Eg såg ein gut på Norske Talentar som rokka med rokkering. Då fekk eg lyst til å gjera det same, seier han.

Han har enno nokre år til å finna ut kva han vil gjera som vaksen.

– Eg kunne gjerne tenka meg å halda fram med slike kjekke aktivitetar som no. Samtidig kan eg tenka meg å jobba med menneske. Spørsmålet står difor ganske opent.

For øvrig er Tiril og Fridar to av seks born i familien som alle held på med ulike aktivitetar.

- Annonse -
- Annonse -
- Annonse -