Daniel Måge ser ikkje vekk frå at bandet kan overleve i ti år til. Foto: Kari Mendelejev von Svanberg
- Annonse -
- Annonse -
- Annonse -

På laurdag inviterer han til jubileumskonsert med bandet D’AccorD.

– Som regel treng eg noko som tenner lunta. Det kan vere at eg har spelt noko feil på gitaren. Då tenker eg, åh, det var tøft, og så kjem heile songen. Akkurat som å opne ein spring.

Heilt sidan oppveksten har Daniel Måge hatt ein visjon om å starte eit progrock-band. I år feirar han ti år som frontvokalist i det kritikarroste bandet D’AccorD frå Stord. Men trass i lang fartstid som musikar, er det ingen fare for at inspirasjonen tørkar ut med det første.

Presterer best på piano

– Mange av låtane mine blir til på tangentar, for det kan eg ikkje spele. Alle akkordar på piano blir for meg som ei ny oppdaging, sjølv om eg gjerne spelar dei samme akkordane på kassegitaren til vanleg, seier Måge til Stord24.

Me møter han heime i studio i kjellaren. Måge, som opphaveleg er frå Haugesund, flytta til det nye huset på Stord i 2014. Her bur han saman med familien, og brukar kjellaren som arbeidsplass og lekeplass for å utforske ny musikk.

– Eg synes det er mykje kjekkare å lage musikk enn å øve. Det treng ikkje nødvendigvis bli ei bra låt. Men stort sett kan eg setje meg ned med mikrofonen framfor meg og lage ein song.

Frå Haugesund til Argentina

- Annonse -
- Annonse -

I 2008 tok han initiativ til å danne progbandet D’AccorD. Sommaren same året ga dei ut si første sjølvfinansierte og sjølvtitulerte plate – eit prosjekt som skulle vise seg å opne nye dører for nybegynnarbandet.

Plata mottok ein femmar i Haugesunds Avis og dukka etterkvart opp på argentinsk radio. To år seinare signerte dei platekontrakt med Karisma i Bergen, og har i etterkant av dette gitt ut ytterlegare to album, spelt på Hovefestivalen og vore oppvarmingsband for Enslaved.

Foto: Kari Mendelejev von Svanberg

«På cloud nine»

Så langt i år har dei gitt ut ein ny singel, og ventar to singlar til i løpet av dei neste månadane.

På laurdag skal bandet ha jubileumskonsert på Arena med både noverande medlem, tidlegare medlem og gjesteartistar. Måge lovar ein stor produksjon og seier det vil bli duka opp til skikkeleg storkveld.

– Det er ein grunn til at me har klart å halde på i ti år. Musikk er noko me prioriterer. Det er ikkje alltid like gøy, av og til er det tunge tak. Men så kjem belønninga. Litt sånn som nyttårsafta, at ein liksom lever på «cloud number nine». Då er eit heilt år med øving verdt det.

- Annonse -

Pompøs og stormannsgal

– Korleis har musikken utvikla seg dei siste åra? Har det gått i den retningen de ønska?

– Eg vil påstå at me gjerne har kome meir tilbake til røtene våre. At me lagar meir pompøs og stormannsgal musikk, akkurat slik me likar det. Me er framleis prog, men er streit rock n’ roll også, seier Måge.

Dette i motsetning til kva somme kanskje trur, som gjerne forbinder Måge med «hardcore» musikk, langt hår og slengbukser frå 70-talet.

Pappa si platesamling

– Eg har blitt veldig glad i gamal soul og visemusikk, blant anna. Det trur eg kan høyrast i musikken. Ikkje minst litt sånn Rolling Stones og The Beatles, meir enn at me eigentleg har vore så inspirert av andre progrock-band i nyare tid.

– Men kvifor akkurat 70-talet?

– Eigentleg har eg vakse opp med MTV. Då høyrde eg jo på musikk som folk flest høyrde på. Men far min prioriterte fotballkanalar på TV, og me hadde ikkje råd til begge deler. Så då byrja eg å bla i platesamlinga til pappa, seier Måge.

Den store lottobilletten?

Han ser ikkje vekk frå at bandet kan overleve i ti år til.

– Eg har ofte tenkt at me ikkje kan toppe dette her. No har me trekt lottobilletten, liksom. At dette var så mykje som me nokon gong kom til å få. Det er kanskje ein norsk tanke, at ein ikkje skal ha for høge ambisjonar. Men dette har vist seg å ikkje stemme.

– Eg er ikkje lei enno, og ser ikkje ein grunn til å stoppe no.

- Annonse -
- Annonse -
- Annonse -