Trond Betten (t.v.) har fått The Alarm-stjerna Mike Peters til å spele i Sagvåg på søndag. Foto: privat
- Annonse -

The Alarm-vokalisten Mike Peters har turnert med U2, Neil Young og Bruce Spingsteen. Søndag spelar han på Anno 1564 i Sagvåg.

– Dette var favorittbandet mitt som ung, og eg var på konsertar med dei då eg var 16-17. At eg skulle bli kompis med barndomshelten men er jo veldig morosamt.

Det seier Trond Betten, som er ein av drivarane bak puben Anno 1564 i Sagvåg. Husnesingen har kjent Mike Peters (60) frå Wales i mange år, og har vore bookingmanageren hans sidan 2007.

– Me har jo etter kvart fått eit venskap. Han har vore på ferie hos oss på Husnes før.

Har selt over fem millionar plater

Peters er mest kjent som vokalist i bandet The Alarm, og har selt over fem millionar platar på verdsbasis. Han har halde på i rundt 40 år, og har turnert med dei aller største stjernene.

– Han er absolutt å rekne med i musikkhistoria.

- Annonse -
- Annonse -
The Alarm under Kalvøya-festialen i 1984, med Mike Peters i raud jakke. Foto: Wikimedia Commons

Rockestjerna legg ut på ein liten miniturné på Vestlandet i helga, saman med kona og borna. Fredag blir det konsert i Farsund, laurdag utanfor Stavanger og søndag blir det altså konsert i Sagvåg, før turneen blir avslutta i Bergen.

Betten fortel at han har utvikla eit heilt spesielt venskap med Peters i løpet av dei siste åra, og har berre godord å seie om walisaren.

– Dette er veldig positive folk, og me har aldri heva røysta mot kvarandre i løpet av desse 12 åra. Dei er blitt veldig glade i Norge, så difor ordna me ein slik turné. Då var eg rask frampå å spele på pubben me driv i Sagvåg.

Fekk leukemi

Han fortel at Peters har ein veldig spesiell historie. Han fekk diagnosen leukemi i 1990, og skulle eigentleg ikkje vere i live i dag.

– Han var ikkje spådd noko særleg gode utsikter. Mirakuløst nok klarte dei å finne ein behandling som funka. Han har halde seg frisk sidan, men går framleis og sjekkar blodverdiane sine kvar tredje månad.

- Annonse -

– Dette trur eg gjer noko med perspektivet hans. Han er eit veldig spesielt menneske, og har ein utruleg positiv energi, seier Betten.

Konserten er bevisst lagt til søndag, for å unngå at publikum blir for rølpete.

– Han er ein historieforteljar, og fortel frå når han har møtt Sex Pistols og historiar frå turnébussane med Springsteen. Så eg ville ha ein setting der han kan fortelje litt røvarhistoriar. Søndag kjem til å bli ein kjempefin dag for å oppleve noko utanom det vanlege i Sagvåg.

Stord-artisten Endre Olsen kjem også til å gå på scena saman med Peters på søndag.

Tusenvis av vinylplater til sals

Men dette er ikkje den einaste grunnen til å vitje pubben i Sagvåg i helga. Det skal i tillegg bli arrangert ei platemesse.

– Laurdag og søndag så har me ein del utstillarar frå Haugalandet, som har med seg ein del tusen platar som dei skal selje. Og så sleng me også på eit par tusen platar.

Betten oppmodar både plateinteresserte og dei som har mange vinylplatar dei ønskjer å kvitte seg med om å ta turen.

– Her kjem det folk som er genuint interessert i plater. Viss det er nokon som sit på ein godbit heime, så ta det med!

– Det passar ekstra bra at Mike Peters er skikkeleg vinylfrelst. Så det var midt i smørauget, seier Betten.