Aman Ullah (nærast) var ein engasjert og blid gut då han budde på Litlabø mottak. Biletet er frå Friluftsfestivalen på Litlabø i 2016. Her saman med kameraten Israr. Foto: Jonas Sætre/Stord24
- Annonse -
- Annonse -
- Annonse -

– Eg blei veldig prega då eg fekk vite det. Aman var ein fantastisk fin kar, men hadde ein ryggsekk med ein bagasje som få hadde makta å bere på, seier tidlegare mottaksleiar Håkon Frode Særsten.

Under flyktningbølga i 2015 var Aman Ulla ein av mange mindreårige asylsøkjarar som kom til Norge.

Den afghanske guten blei då busett på Litlabø mottak som 15-åring. Han budde på Litlabø fram til han, som så mange andre frå Afghanistan, fekk avslag på asylsøknaden sin. Turen gjekk då til Paris, der han fekk opphald og jobb på restaurant.

Tysdag morgon vart han funnen død i leilegheita der han budde, 18 år gammal. Det er verga hans i Norge, Gro Dregelid, som bur i Sagvåg, som melder dette.

– Det er med stor sorg og sjokk at me tok i mot beskjeden. Aman elska Norge, og planlagde livet sitt her, skriv Dregelid i eit Facebook-innlegg.

– Som mange andre fekk han avslag frå norske styresmakter og la ut på ny flukt til Paris. Eg er stolt over at han valde meg til sin norske mamma. Eg veit kor sårt han sakna familien i Afghanistan. Han vil alltid ha ein stor plass i hjartet mitt, skriv ho.

Håkon Frode Særsten. Foto: Venstre

Vart veldig prega

- Annonse -
- Annonse -

Den triste beskjeden har gjort eit stort inntrykk på tidlegare mottaksleiar på Litlabø mottak, Håkon Frode Særsten, då han blei informert i dag tidleg.

– Dette var ein veldig lei sak. Det må eg berre sei. Eg blei veldig prega då eg fekk vite det. Aman var ein fin og svært følsam gut, som hadde ein ryggsekk med ein bagasje som få hadde makta å bere på.

– Han var ein fantastisk fin kar. Ein person som alltid var med på dugnad og som alle på mottaket fekk eit godt forhold. Han hadde nokre svarte augneblikk han òg, men det var ikkje nokon som ikkje greidde å bli glad i han, seier Særsten.

Skal ha klaga over smerter i brystet

I følgje den tidlegare mottaksleiaren skal Aman Ulla ha klaga på smerter i brystregionen då han drog på jobb måndag kveld, og tok kontakt med nokre vener og sa han kjende seg veldig dårleg. Då dei kom for å hente han på jobb fann dei han død i dag tidleg.

– Det tyder jo på at det har vore relatert til hjartet, seier han.

Dregelid fortel at 18-åringen jobba svært lange nattskift i Paris, sju dagar i veka.

Den tidlegare mottaksleiaren fortel at det ikkje berre var saknet etter familien i Afghanistan som gjorde livet tungt for 18-åringen.

- Annonse -

– Han hadde ein spesiell historie, for då han tok seg til Europa så drukna nokre av venane hans på vegen. Han hadde mange grunnar til å sjå mørkt på det. Men han tok seg inn og jobba på, og gjorde alt for å kome på rett kjøl. No var han på god veg til å kome i normal rytme i Paris.

Verge Gro Dregelid hadde eit nært forhold til den afghanske guten. Foto: Skjermdump/Facebook

Lengta «heim» til Litlabø

Særsten fortel at han har hatt kontakt med 18-åringen via Skype etter at han drog frå mottaket.

– Eg har hatt ein del kontakt med han. Han viste fram leilegheita han hadde skaffa seg i Paris, som han var veldig stolt av. Me hadde mange samtalar og han lengta ofte «heim» til Litlabø.

– Hadde han eit håp om å kome tilbake til Norge?

– Nei, eg trur han hadde avskrive Norge, sjølv om han var veldig glad i Norge. Men målet  hans var fast opphald i Frankrike, og få jobb og utdanning der.

Glad i matlaging

Underteikna journalist møtte Aman Ulla under Stord friluftsfestival på Litlabø sommaren 2016, og refererte slik frå møtet:

Aman Ulla (15) var sjefskokken frå mottaket, og hadde stått opp klokka 7 på søndagsmorgonen for å starta på brøddeigen. Det velsmakande brødet med kvitlauk og urter gjekk unna, ja, som varmt kveitebrød. Det smakte fortreffeleg saman med afghansk te, og det var tydeleg at gleda var stor over å vise fram smakane frå heimlandet.

Matinteressa er noko som også Særsten hugsar godt.

– Han var ein fantastisk flink kokk, og brøda han bakte var fantastisk gode. Han kom alltid inn til meg på kontoret når dei var nysteikte.

Dregelid opplyser til Stord24 at det blir minnestund for Aman Ulla heime hos ho i Sagvåg førstkomande laurdag.

- Annonse -