- Annonse -

Kvinnherad-samfunnet er råka av endå ein alvorleg trafikkulukke der ein ungdom er involvert.

Ein 19 år gammal mann frå Kvinnherad er kritisk skadd etter å ha køyrt inn i eit tre i Sæbøvikvegen på Halsnøy i 05.30-tida søndag morgon. Ulukka skjedde like ved Eid kyrkje.

Det var ein nabo som varsla AMK-sentralen etter å ha blitt vekka av det kraftige smellet.

Fastklemt

Den unge mannen sat fastklemt i bilen og brannvesenet måtte hjelpe med å få han laus. Deretter vart han frakta med luftambulanse til Haukeland universitetssjukehus.

Sjukehuset melder søndag føremiddag på nettsidene sine at mannen er kritisk skadd.

Som ein følgje av trafikkulukka er ferjesambandet Skjersholmane-Ranavik flytta. Ferja går no direkte til Sunde og stoppar ikkje på Halsnøy.

- Annonse -

I 11-tida melder politiet at krimtekniske undersøkingar på staden er avslutta. Redningsbil er på veg for å hente bilen. Vegen er per no open for vanlege bilar, men stengt for større køyreøty.

Mange ungdomsulukker

Ulukka er ein av fleire liknande alvorlege ulukker som har skjedd i Kvinnherad den siste tida, som involverer unge bilførarar.

I november i fjor omkom ein mann i 20-åra etter ein kollisjon i Stussvikhovdatunnelen i Kvinnherad.

I slutten av desember vart tre unge menn alvorleg skadd etter ei trafikkulukke i Halsnøytunnelen.

Berre nokre dagar seinare omkom ein 18 år gammal mann i ei ulukke mellom Sunde og Husnes.

- Annonse -